حبيبى

حبيبى كل سنه

وانت فى هنا

ويارب السنه الجايه

تبقى عندى انا

تعالى تعالى

حبيبى تعالى

انا اجرى وانت تجرى

واللى يسبق بدرى

يجرى على حبيبه ويرمى

اشواقه وغرامه

زى الورد والندى

حبيبى كل سنه

وانت فى هنا

ويارب السنه الجايه

تبقى عندى انا

ياسلام عشنا كتير

ياسلام شفنا كتير

الله على احساس

محسسنى انى بطير

معاك.......معاك

حلم عمرى لقيته معاك

الحب انا حبيته معاك

وقلبى دق ورق

وداق الفرحه وياك

تعالى تعالى

حبيبى تعالى

انا اجرى وانت تجرى

واللى يسبق بدرى

يجرى على حبيبه ويرمى

اشواقه وغرامه

زى الورد والندى

حبيبى كل سنه

وانت معايا

..........................
محمود عيد

فقير بيسأل الفقر

.........................................

فقير عاش عصر مبارك

ومكمل فى عهد مرسى

.........................................

فقير ...شايف الفقر

كأنه صقر

فارد جناحاته

على كتافه

أستتقله

سأله.....ياااعم؟

ياعم مالك بيا

حِل عنى شويه

قضيت نص عمرى معاك

قاله ....

والنص التانى هاتتعود عليا

يعنى مفيش مفر من المر

دا العمر ايامه بتعدى وبتمر

يافقير ما انت اللى اخترت

وكنت حر

ورحت على الصندوق وصوت

مش ايدك دى اللى بيها علمت

بعد مالقيتنى مكمل معاك ندمت

كان فين عقلك لما انتخبت

دلوقتى بتلومنى وعايزنى افارقك

ماتلومنيش روح شوف اللى سارقك

ومستغلك وبيزلك

زى ما كان اللى فات بيعاملك

فارقة ايه اسامى يابيه

علشان بقينا عِشره مينفعش اجاملك

عِشره دا انت طيب للقِشره

لا و ردودك سريعه ومباشره

يعنى يا فقر ورانا ورانا

خلصنا من مبارك وعز وجرانه

وقعنا فى واقع

ربنا بيه بلانا

............................
محمود عيد

ماليش فى السياسه

ياما ماتخافيش

انا فى السياسه ماليش

ولا اخونجى

ولا بورشمجى

ولا بشرب حشيش

ولا غاوى تهبيش

ولا نازل فى الخلق تلطيش

طول عمرى بجرى 

على لقمة العيش

وبرجع على مفيش

بنام من المغربيه

حتى العشا بتروح عليا

بقوم من الفجريه

بفرك عنيه

المغمصه

على لقمه متغمسه

بمدمسه

بقعد عليها للمسا

عيشتى فى الرضا

ماحلتيش اللضا

وجيوبى فاضيه منفضه

وتشهد عليا المحفضه

وتقسم بالله العظيم

مدخلهاش مليم يتيم

تشكى يقولك بكره تتعدل

كل يوم وزاره بتتبدل

وحال البلد بقى متبهدل

ولا حد فاهم ولا حد راسى

الكل طاير على الكراسى

مليون سؤال ماسكين فى راسى

الثوره نجحت؟؟ ولا لسا؟؟

رئيس حقيقى ولا كوسه ولا بلصه؟؟

سينا لينا ولا كتبنلهم مخالصه؟؟

هنفضل عايمين ولا بكره لينا مرسا؟؟

ولا لسا ولا لسا ولا لسا

..........................................
محمود عيد

الاهلى

ا لـــــــا هـــــلــــــــى

فوزنا كسبنا خدنا الكاس

ورينا عزيمتنا لكل الناس

يلا نقف للابطال

اللى ضربوا احلى مثال

ان المصرى

حضاره وعصرى

ومتأصل من الاساس

فوزنا كسبنا خدنا الكاس

ورينا عزيمتنا لكل الناس

يلا نحيي الابطال

اللى ضربوا اروع مثال

فى الرجوله والشهامه

وجوه الملعب استقامه

وان المصرى كله حماس

فوزنا كسبنا خدنا الكاس

ورينا عزيمتنا لكل الناس

.........................................
محمود عيد

امشى وسبينى

امشى وسبينى

أمشى وسبينى

عيشى حياتك وانسينى

وبلاش تترجينى

انا سلمت لاحزان سنينى

لا فرح عارف طريقه

ولا حلم هعرف اجيبه

ولو بعتينى اشوف الحب

هرجع مكوى بلهيبه

قلبى داب زى الشمع

روى تراب همومى الدمع

نبتت فيه احزانى

واديكى شايفه الوضع

بقى ايه

هقولك ايه

انسينى

و دورى فى الحياه

على واحد مقلش اه

لكن انا الحزن سَكنى

بيسبنى بجرى وراه

لكن انتى عايزانى

اسمك ما يفارقش لسانى

طاب ازاى وهو متمرر

من كتر ما داق احزانى

انا صاحبت الالام

بفرد همومى وعليها بنام

وادى الايام 

وادى الاحلام

وادى الحياه

وادى سنينى

امشى وسبينى
..................................
محمود عيد

انت حياتى

انت حياتى 

..........................

قولى انتا

هتفضل لامتى

تسألنى

عنك

وعن حبك

طاب اسمعنى

انت القلب ولو جرحتُه

انت الحب وحلاوتُه

انت الحنين

انت السنين

انت اجمل عمر عشتُه

انت اللى رجعت ضحكتى

انت اللى ذوقت فرحتى

انت الامل

كل الامل

انت حياتى و دنيتى

عارف انت

انا من قابلك انت

كنت تايه وبدور

وطريقى ضلام

لقيت حبك نور

طريقى وحلا الايام

قولت ايه انت؟؟

لو لسا مش عارف

اسأل الشفايف

اللى دايماً فى سيرتك

وقلبى وحالاته

وسرعة دقاته

من اول يوم قابلتك 

فيه... قولت ايه؟؟؟ انت

...............................
محمود عيد

ايه غيرك

تقرأ بلسان مؤنث
......................
ايه غيرك؟؟
......................

ايه غيرك من ناحيتى

ليه تسبنى لعذابى ووحدتى

ما الشوق هوه هوه

ومكانك لسا جوه

لو زعلتك فى حاجه

تعالى عرفنى غلطتى

ايه غيرك من ناحيتى

ليه تسبنى لعذابى ووحدتى

دا دموعى اللى عالمخده

روت جوه كتابى الورده

وادى النجوم شاهده

انى مُخلصه فى محبتى

ايه غيرك من ناحيتى

ليه تسبنى لعذابى ووحدتى

روحى وقلبى وعقلى

يروحوا منى لما يندهلى

لكن لما يسبنى

تجرح خدودى دمعتى

ايه غيرك من ناحيتى

ليه تسبنى لعذابى ووحدتى

كنت بخلى الدنيا وانا جمبه جنه

وكان يقولى اقوم اقوله لا استنه

ومهما كان الوقت يعدى علينا

كنت باخليه يسعد ويتهنى..بمحبتى

ايه غيرك من ناحيتى

ليه تسبنى لعذابى ووحدتى

لو ليك عذر انا عذراك

لو هطول خدنى معاك

لكن لو هتسبنى كدا

اخد وادى ...هموت ولا هالقاك

وحشتنى ياكل دنيتى

ايه غيرك من ناحيتى
.........................................
محمود عيد

نظرات عاشق

مرآةٌ من ذهب ومرآةٌ من فضة

يَنظُرانِ لكِ وأنتِ تَتَزينين

ومِشطٍ من شوقهِ أسنانهُ مُنقضه

على شعركِ الغجرى وأنتِ تُمشطين

وأنا على اريكتى كاعادتى

أنظُرُ مع الناظرين

لامرأةً جعلت الدنيا أمامى بُستانا

يجرى الخيرُ على يديها

كامجرى الدم فى الشريانا

وضعت ليا السعادة فى إناءٍ

تُسقنى مِنهُ إن كنتُ عطشانا

فقد كنتُ فى دنيا الهوى

مجهول الهويةَ عُريانا

فألبستنى ثياب المحبةِ

فا أصبحتُ بحبها عاشقٌ ولهانا
................................
محمود عيد

حاسس بيك

حاسس بيك

وبيلى فيك حاسس بيك

حاسس بيك مكسور

حاسس بيك

وماية البحور

دموع عنيك

مش بخُطرى ولا بخُطرك

دا غصبن عنى وعنك

بعدت يا حبيبى عنك

من خوفى عليك

حاسس بيك

وبيلى فيك حاسس بيك

مش محتاج اقولك مبررات

ولا بقولك نادم على كل اللى فات

معاك من ايام واحلام وذكريات

دا انا هبكى العمر عليك

حاسس بيك

وبيلى فيك حاسس بيك

لو لينا نصيب هنتقابل تانى

اما لو بقى ليك حبيب هتنسانى

لكن مهما تغيب هترجع تلقانى

بفكر فيك

حاسس بيك

وبيلى فيك حاسس بيك

..................................
محمود عيد

بقوم بنفسى

بقوم بنفسى

بقوم بنفسى ارتب ذكرياتى معاك

واخليهم قدام عيونى دايماً

ليه لما ألقيها أبص فيها ألقاك

ولا بحاول انساك ابداً

هو انا اقدر ولا يجينى قلب

انى انسا انسان عَلمنى احب

ونسانى الهموم وعطانى

امل جديد لدنيا تانى

النسيان دا اول شيئ نسيته معاك

على قد ما انت ناسى

قلبى وحبى واحساسى

على قد ما انا فاكرك

وبشتاقلك ويبرهنلك اخلاصى

كل لحظه عشناها

كل كلمه قولناها

والوعود اللى خدناها

فاكرها باليوم والساعه واللحظه

وسهرنا تحت القمر

وكلامنا اللى كان كله امل

ولما كنت فحضنك تحت المطر

بغسل همومى دى كانت احلى لحظه

قد الدنيا وقد الناس

بعيشلك بكل خلاص

احلا حاجه فى حبى ليك

انه مبنى على اساس

الاخلاص ... الاخلاص.. ف هواك

بقوم بنفسى ارتب ذكرياتى معاك

واخليهم قدام عيونى دايماً

ليه لما ألقيها ابص فيها ألقاك

ولا بحاول انساك ابداً

...............................
محمود عيد

هالهوطه

هالهوطه ............ فى مجلس الشعب

والشعب حالق زلبطه

تعب من الشد فى شعره

مفيش قرار يشفعله

يصرخ ومين يسمعله

صدى صوته بيرجعله

اتارى هالهوطه كداب

وكلامه كله اونطه

هالهوطه .... فى مجلس الشعب

والشعب حالق زلبطه

تعظيم سلام للبرلمان

اللى مشا الامريكان

يا سياسه بوش جير

سلام مربع للمشير

اللى راح بنفسه

وصلهم لحد المحطه

هالهوطه.... فى مجلس الشعب

والشعب حالق زلبطه

لسا بالدنا منهوبه

دلوقتى احسن سبوبه

انك تتاجر فى الانبوبه

ماخلاص المشنقه منصوبه

على رقبة الفقير

اللى فاضلوه سطه

هالهوطه... فى مجلس الشعب

والشعب حالق زلبطه

برلمان مفهوش اتفاق

كل يوم فى خناق

لا واللى راح عمل عمليه

وسبها فى البلطجيه

وكان فاكر إنه

هيقدر يوكلنا الاونطه

هالهوطه ...فى مجلس الشعب

والشعب حالق زلبطه

كام مشروع عملتوه

وكام حق شهيد جبتوه

وكام عميل سرحتوه

وكام مجرم برئتوه

ياعالم لوع..............

يا عالم لوع وكدب واونطه

هالهوطه..فى مجلس الشعب

والشعب حالق زلبطه

ماشيين ورا ابو جيش

قربتوا تشحتونا العيش

العدل غاب والامان مفيش

خايف اقول عليكى يا بلدى مابقيش

ابقى وحش وقليل اصل

ومستهلش اشرب من النيل شفطه

هالهوطه ..فى مجلس الشعب

والشعب حالق زلبطه

هالهوطه انا تانى مهعرفوش

دا بيتكلم فى اللى ليه واللى ملهوش

دا ربا من ورايا ووراكى يا بلدى كروش

بعد ما كان مبيعرفش يعد القروش

دلوقتى بيقول للفلوس

تعاليلى يا بطه

هالهوطه..فى مجلس الشعب

والشعب حالق زلبطه
......................................
محمود عيد

صحيفة العشق

صحيفة العشق

قلبى إذا رأها يميل

بشعرِها وخصرِها الجميل

ويُغنى غُنَى العصافير

ويَطيرُ فى سماها يَطير

بجناحين مثل الحرير

وإن رأتها العين....

تحدث اشياءً خُرافيه

يَزيدُ الرزق

يَزيدُ العشق

تزيدُ الكتبُ الشعريه

وكل صباحٍ ومساءٍ أُحييها

بكلماتٍ تسعد النفس وتُحييها

ودائما اوصى الليلَ والنهار

كما اوصى الجبالَ والانهار

ورمال الشواطئ والبحار

والطرقاتِ والنباتِ والاشجار

يُحيوها بمثل ما اُحييها

لاننى أصبحتُ لها عاشقا

كاعشق البشر للقمر

كاعشق العيون للنظر

كاعشق النجوم للسهر

كاعشق النبات للمطر

كاعشق النهار للشمس

كاعشق الاذان للهمس

كاعشق الايادى للمس

كاعشق اليوم للامس

كاعشق الاسماك للماء

كاعشق الطيف للسماء

كاعشق الصوت للغناء

كاعشق الجروح للدواء

وتناولى يا صحيفة العشق اخبارى

ودونى وانشرى كلماتى واشعارى

واعلنى عن اسطورة عشق

ظهرت ولاح نجمها فى الافق العالى

وسيأتى يوماً اروى فيه حكاياتى

وترفرف فوق قلعة العشق راياتى

وسيردد بعض العاشقين كلماتى وابياتى

وسأصبح مولى للعاشقين وانتى مولاتى

.................................................. ..
محمود عيد

شمس العشق

شمس العشق
.............................

افعل يا حبيبى ما تريد 

واجعل الايام تأخذك لبعيد

وسأبقى مكانى انتظرك 

على امل فجر جديد

على يديه شمس العشق تشرق

وعلى ان نأتى سأبقى استنشق

عِطرُك اللذى يُحيي النفوس

وبه ابنى امل جديد وانشئ

وسأصنع من ظلام ليلى نور

وسأنتظرك مهما تصاعبت الامور

وسأنادى عليك بصوت

يحيّ من فى القبور

والى ان ارك ثانيتاً

يكفينى اعرف اخبارك

واكون شمس نهارك

وان غاب نجم ليلك

ستجدنى فى انتظارك

قطر الزمان

قطر الزمان

على سكه حديد وقضبان

ماشى بيا قطر الزمان

لقيت فيه اشكال والوان

ناس فقيره وناس اعيان

فى الميعاد انا داخلته

كل واحد فإيده تذكرته

وله كرسى وله مكان

فى قطر الزمان

لقيت فيه اللى مروح

واللى رايح يتفسح

واللى همه ينام بيه

وعليه يصبح

دا ياعينى الغلبان

فى قطر الزمان

واللى عن اهله متغرب

واللى طافش متهرب

عليه تار يا ستار

داخل يتسحب

نفسه يلاقى الامان

فى قطر الزمان

لقيت اللى هاوى السفر

وفلاح وعمده وشيخ غفر

واللى معاه معاه ملايين

واللى فاقد البصر

والسليم والتعبان

فى قطر الزمان

ومشى بينا وعدى بينا

من مدينه لمدينه

جوانا الحزن مالينا

فى اى محطه يا فرحه هتستنينا

وماشى

يخضخض فيا واقول ماشى

سهرانه عنيا منيماشى

واقول ماشى

شايف حلمى قدامى

لكن ايدى مطيلاشى

ماشى

ما العين بصيره والايد قصيره

ينقطع لسانى لو جبت سيره

بأنهم.....خدوا فرشة احلامى

ونيمونى عالحصيره

وعدى النهار بطوله وجه اليل

وانا لسا مشوارى طويل

شاب طموح

لكن مجروح

بقول مواويل

للغلابه

ضلوعى ربابه

وصوتى ناى

غنى معاى

يا ليل........ غنى يا ليل

شجعنى

هون اللى واجعنى

قلبى سايبه

مع حبايبه

مرضيش يتبعنى

ويجى معاى

غنى معاى

يا ليل ........ غنى ياليل

وانسنى

خلى طيفك يُحرسنى

وقمرك يضوى

وندى فجرك يروى

الحزن اللى ساكنى

بقاله زمان

وقلبت على نفسى المواجع

وبقيت بذاكر فذكرياتى واراجع

ومع كل ذكره

ببكى بحرقه

وفقلبى نار رغم ان الجو ساقع

والكل بردان

فى قطر الزمان

وقبل المحطه بلحظات

نفضت غبار الزكريات

ورجعت من التانى للواقع

اللى كله الام واهات

....................................
محمود عيد
13/01/2012