شمس النهار

(إحمى الكانون) يابهيه

وقيدى النار

وشمعى الفتله يا سعديه

فى توب العار

وأنسى خلاص يأنهار

تاخدى بالتار

لا كانت فيه ثوره

ولا فيه ثوار

طلع الشيخ على المنبر

نسى الاذكار

وقف الشيخ متسمر

تايه محتار

المسؤليه صعبه ياخوانا

المؤيد بيروح الجنه

والمعارض بيروح النار

واللى بين البنيين متأخونين

ماشيين مع التيار

اما بقى اللى مش فاهمين

حاجه فى سوق الخضار

على الكنبه قاعدين

مستنيين شمس النهار

والشمس عمرها ما تطلع

الا على الاحرار
...........................
(احمى الكَانون) هى الفرن البلدى او المنقد
....................

محمود عيد

بنات حارتنا

بنات حارتنا كلهم عينهم منى

فى الرايحه والجايه مش راحمينى

اللى تضحك و تتبسم

واللى فى المشيه تتكسم

واللى حالها يتأزم

وتغنى يا ظالمنى

واللى متخيلانى فارس

واللى عملانى وارث

واللى فكرانى راقص

والشوق محزمنى

واللى ترمى مشبكها

وتندهلى لافينى

واللى عيزانى اشبكها

إن شالله بدبله صينى

واللى تشكينى لاختى

اخوكى ناسينى

من امتى انا فاكرك

تعالى باقرينى

لاعمرى ميلتلك

ولا رمشك طرف عينى

هيه معقوله حوله

فى طريقى تهدينى

شوفى يابنت الناس

ريحيهم وريحينى

انا بحب واللى بحبها

ماليه عينى

اللى بحبها طعمها احلى

من بنات حوا

كل البنات من طينه

وهيا من حلوى

الخد ورد و القد

حيه بتتلوى

حلوه وحلاوتها زياده

دى الطله فيها عباده

وسبحانه من خلق وسوى

...........................
محمود عيد

ماشتقتليش

اشتقت لكلامى معاك

ولا ماشتقتليش

لسا ساكن حبى جواك

ولا مافيش

اشتقت لكلامى

اشتقت لسلامى

اشتقت لغرامى

ولا ماشتقتليش

وصوتى وغُنايا

وضحكك معايا

وفصول الحكايا

اللى ماتتنسيش

ومكانا لو سألنى هاقوله ايه

دا اللى سميت اسمك عليه

والورده اللى بإيدك زرعتها فيه

معقوله من بعدك راح تعيش

ماقولتليش

اشتقتلى ولا ماشتقتليش

اشتقت لزمانى

اشتقت لحنانى

والاحلام والامانى

ولا ماشتقتليش

و فاكر جوباتى

ورسايلى وكلماتى

وقصايدى وابياتى

ولا مافاكرنيش

ماقولتليش

ازاى من بعدك راح اعيش

انا فاكرك مش ناسيك

ما انت بصراحه ماتتنسيش

بس ما قولتليش

فاكرنى ولا مافاكرنيش

................................
محمود عيد

حكمتك يارب

حكمتك يااااااااااااااارب
...........................

اللى ممعهوش قرش

يجيلوا كل سنه كرش

واللى معاه ملايين

بيسعى لكن مقدرش

.............................
محمود عيد

انا نازل

انا نازل..........ما تنزلشى

ليك معارض...ماتضربشى

من حقى اعبر عن رأيي

و حلمى ما يموتشى

عشمتنى بالحلق

خرمت انا ودانى

وتجبلى حقى اللى اتسرق

وتبنى اوطانى

وثقت فيك واديتك

وبقيت اخوانى

واخويا بقى سلفى

وابن عمى علمانى

اصبحنا مُشتتين

فاضل لنا ايه تانى

بتجمعنا طبليه

ويفرقنا ميدان

والطبع عدوانى

..........................
يارب احمى مصر

محمود عيد

عشق الصعايده

عــشـــــق الــصــعــايــده
...........................

الليل سارق

وانا تايه فى الشوارع والمفارق

من الصبح لا كلت ولا شربت

ودا عندى مش فارق

انا اسمك بيبل ريقى

ولوجعت ادخل دارك

قلبك دا بيتى

وانا فيه ملك

متوج على عرشه

واللى فكر يدخله غيرى هالك

ما قلب حبيبتى

مش لعبه بذمبلك

مش كل شويه الاقى واحد

عايز يلعب بيها ويقولى عاشق

دا اللى يقرب منها و يبصلها

هيلاقى نفسه فى الساقيه عالق

اصل قلب حبيبتى

مش لعبه بزمبلك

خاف على نفسك لتتهلك

بغير عليها وغيرتى سم

تقول عليا غشيم

اقولك يا غشيم

دى الغيره علم

فيها بالحبيب تهتم

وتحلى فـعينها

وتملى مكانك

وتقول بحب سبع

يحمينى من كل كلب ... وضبع

الرجوله ادب

مش هز كتاف

ومن يوم ماحبك انكتب

عليا عليكى بخاف

ياه على عشقكم يا صعايده

فيه علم وفيه فايده

ان عشقنا قلبنا تبقى ناره قايده

وان كرهنا يتمسح اى حد قدامنه

احنا الصعايده

علم ورجوله وعشق وغيره

وعلمنا وكلامنا له فايده
....................
محمود عيد

موال الحب

خد شنطته ورحاله

وساب قلبى لحاله

طاب روحى لما تشتقله

مين هايودهاله

يا غايب وفقلبى مكانك

يلى مستحيل نسيانك

يلى واخد عمرى معاك

والله ما قادر انساك

ولا هنيلى نوم علشانك

عرفت من بعدك

ازاى عذاب الحب مُر

وازاى تعيش متقيد

من بعد ما كنت حر

وازى دمك يتصفى

وازاى عنيك تخر

وازاى يبان عليك

مهما كاتمت السر

ياااااااااااااااااااااااااااااااااه

دا الحب دا بلا

يخليك تعيش طول عمرك

تحل فى مسأله

ويعدى عمرك وتلاقى نفسك

برده ماحلتش

وكل اللى سمعته عن الحب 

دا كان هتش فهتش

و ان الحب ذنب

مايغفروش لا صوم ولا صلاه

الحب دا مواله كبير

اللى بيقوله خبير

وأن سمعته تعقله

ومتقولش انا لسا صغير
............................
محمود عيد

مهر الجنه

الصبر يرفع قدر

العبد عند الله

والصلاه تُريح الصدر

من الالام والاه

والصوم كأنه فجر

تسعد بنوره السما

والزكاه لها الف اجر

ويامحلا الصلا فى بيت الله

وشهاده يبدء بيها العمر

لا أله الا الله محمد رسول الله

يا اأبن أدم اللى يصبر ينول

ومهما طال الليل لابد يزول

و يجى نور بعد ظلام

وتحيا من تانى الاحلام

سيبها على الله همومك هاتزول

ارمى همومك من ورا ظهرك

واجعل صبرك وعملك مهرك

تقدمهم يوم عرضك

وانت بين ايدين ربك

طالب الجنه

ياطالب الجنه

ليه هاتستنه

 حوش مهرك

دا العمر بيعدى

ومحدش عارف ميعاده امتى

قبل ما يجى

ألحق نفسك وحاسب نفسك انتا

قبل ما تلاقى نفسك

قدام ربك يوم الحساب

كُلك عيوب

وصفحات ذنوب ماليه الكتاب

لا هتقدر تهرب

ولا تقول انك مش انتا

قولى لامتى
.......................
محمود عيد

انا مش روميو

انا لا وسيم ولا شيك

ولا فى كلامى فكهانى

ولا قولتلك انا روميو التانى

ولا انجليزى ولا فرنساوى

انا بسيط ولونى قمحاوى

لا سحرت كام بت

ولا كنت حاوى

ولا بنيت ع الهوى قصور

ما انا لاجن ولا مخاوى

هو الانسان ايه

غير قلب طيب...وحنين ...وصادق

ومن غيرهم ايه يساوى

انا بحبك

وزرعت حبك فى ارض طيبه

والمحبه والصدق تقاوى

والمياه كانت دمى

والشريان هوه الراوى

عملت من حبك روايات 

و قصص وحكاوى

قولتها للعاشق والمجروح 

و اللى هاوى

يسمع كلام الحب ..

وللعشق ناوى

حملت حبك على كتفى

رسمت صورتك على كفى

وجبت ربابه وفحبك غنيت غناوى

فى الشوارع والحوارى وع القهاوى

مفكرتش من يوم ما حبيتك

ارسم ولا اذوق فكلامى

ولا اعمل ولا البس حاجه

مش من مقامى

من يومى على كده 

وانتى عرفانى

ميرضيكيش علشان بحبك 

يقولو قلانى

غيرت من شكله ومنظره 

وعمر الناس ما هترجع تنظره

زى حاله الاولانى

انا بحبك وحبك شيئ جميل جوايه

يا منوره ليلى يا قمره و سهرايه

وان كان على الشياكه

عندى مُهره وجلبيه وقفطان وعبايه

ولا حد كاسر عينى

واللى يقول غير كده

اقولو اخرس يا قليل الربايه

يا زهرة البنفسج

يا عود الريحان

يا فُله بتنسج

عطرها فكل مكان

انتى الوحيده اللى عرفانى

وعارفه قد ايه حبك كوانى

وعارفه ومتأكده

انى انا مش روميو التانى
...............................
محمود عيد

مش مسامح

ودى حاجه تتنسى

لما قلبُه قِـــسى

عليا وسبنى اضيع

ودى حاجه تتنسى

لما الورد ينكسى

حزن فى عز الربيع

وتدبل اشواقى

وتموت احلامى

وتضيع ايامى

وتغيب الصور

وتتبدل الحياه بحياه

ويعلىَ صوت الاْه

والامان فين نلقاه

محاوطنا الخطر

ومطر العيون

ماعدش يروى

ولا هايحيّ اللى مات

ومهما يكون

ومهما نقابل

مش هانلاقى زى اللى فات

ولا نديه

ولا نعشله

ولا نخلصله ولو لحظات

لان القلب

ماعدش القلب

مافيش للحب جواه بصمات

كُله اتمحى كُله مات

كُله اتمحى كُله مات

واللى باقيه

زكرى باهته

مش باين لها ملامح

مش مسامح

احلام تعيسه

لفريسه

افترسها طير جارح

مش مسامح

مش مسامح الحب

اللى خلى القلب

شيئ وضيع

زكرى مستحيله تتنسى

ان قلبه فى يوم قِسى

عليا وسبنى اضيع

مستحيله تتنسى

ان الورد ينكسى

حزن فى عز الربيع

.................................
محمود عيد

رباعيات

الهم والحزن جوايا عاشق ومعشوق

والعذاب من البدايه من كاسه بدوق

ذنبى ايه وايه اللى جرا.....دا انا

فى دنيا الهوى ماليش يومين مخلوق

................................................
زرعت ورده جوه جناين ايوب

بسقيها بالصبر م الصباح للغروب

تكبر وتتفرع كل ما يقسى

الحبايب والقرايب والوعد والمكتوب

.................................................


البنت رسمت راجل ..... ع الورق

اتكسفت تبصله وشها حمر واتحرق

طاب ليه رسمتيه يا صبيه.....قالت

دا اللى بيتمناه قلبى ومن ضلوعه اتخلق
................................................

الراجل الاصيل المتأصل

الكلام تلاقيه مـتـفصل

على مقاسُه سيد ناسُه

عُمر العيب مِنُه ما يحصل
.................................................

فتحت كتاب قريت فى سطوره

ناس فرحانين عايشين فى نوره

نور الستر وحلاوة الصبر

وقلوبهم نجوم فى السما بيدوره
................................................
محمود عيد

بلدى يا بلدى

بلدى يا بلدى
وانا نفسى اموت فى بلدى

بلدى بلد الحضاره
احلف بالله خساره
فينا ترابك يا بلدى

بلدى يا بلدى
وانا نفسى اموت فى بلدى

فينا اللى عامل أطرش
واللى فيكى بينهش
واسرق واسبق وعدى

بلدى يا بلدى
وانا نفسى اموت فى بلدى

وعَلملى بالطباشير
اخطاء اخونا الكبير
اللى عامل فيها خبير
وهو بطه بلدى

بلدى يا بلدى
وانا نفسى اموت فى بلدى

بدل ما إيدينا تعمر
وتدعى ليها وتكبر
بكل قوه تدمر
فيكى يا بلدى

بلدى يابلدى
وانا نفسى اموت فى بلدى

وادى كل اللى حاصل
فى الشوارع والمنازل
واللهِ لا انا نازل
واجيب حقك يا بلدى

بلدى يا بلدى
وانا نفسى اموت فى بلدى

على بستانك اعدى
واقطفلك ورده وردى
مرويه من خدى
علشانك يا بلدى

بلدى يابلدى
وانا نفسى اموت فى بلدى

.........................
محمود عيد